အဆီဖုဝက်ခြံ (Whiteheads) ဆိုတာ အရေပြားအောက်မှာ အဆီဂလင်းပိတ်ဆို့ရာက ဖြစ်ပေါ်လာတဲ့ အဆီဖုလေးတွေကို ခေါ်ပါတယ်။ များသောအားဖြင့် မွှေးညှင်းပေါက်ရှိတဲ့နေရာတွေဟာ အဆီအိတ်(sebaceous gland)နဲ့ ဆက်သွယ်နေတာကြောင့် မွှေးညှင်းပေါက်ပိတ်ဆို့ရာက အဆီဖုဝက်ခြံဖြစ်ပေါ်လာပါတယ်။ ပုံမှန်အားဖြင့် အဆီဂလင်းက မျက်နှာအစိုဓာတ်ထိန်းဖို့ အဆီရည်ကြည် (sebum)ကို ထုတ်ပေးပါတယ်။ အဆီရည်ကြည် (sebum)က အရေပြားမျက်နှာပြင်သို့ မရောက်ရှိနိုင်ဘဲ ကပ်နေသောအခါမျိုးမှာ မွှေးညှင်းပေါက်ပိတ်ဆို့လာနိုင်ပါတယ်။ ပိတ်ဆို့နေတဲ့နေရာမှာ sebumတွေ တဖြည်းဖြည်းပိုမိုများပြားလာတာနဲ့အမျှ အဆီဖုဝက်ခြံတွေ ပိုထွက်လာပါတယ်။ 

Comedones ဝက်ခြံဆိုတာ

ဝက်ခြံပုံစံအမျိုးမျိုးရှိပါတယ်။ အဆီဖုဝက်ခြံက comedones အမျိုးအစားထဲမှာပါတယ်။ comedones ဆိုတာ ဝက်ခြံတွေထဲမှာ ပထမအဆင့် မွှေးညှင်းပေါက်ပိတ်ဆို့တဲ့ ပထမအဆင့် ဝက်ခြံကို ခေါ်တယ်။ ပိုးဝင်တဲ့အဆင့်မဟုတ်သေးဘူး။ အဆီဖုဝက်ခြံကို closed comedones လို့လည်း ခေါ်ပါတယ်။

အဆီဖုဝက်ခြံတွေဟာ နဖူး၊ မေးစေ့၊ ပါးပြင်၊ နှာခေါင်း၊ ရင်ဘတ်၊လည်ပင်း၊ပခုံး စတဲ့ နေရာတွေမှာ အဖြစ်များတယ်။ မိတ်ကပ်နဲ့ ခရင်မ်တွေ အလွန်အကျွံလိမ်းခြင်းကြောင့် ဖြစ်ကြတယ်။ နေလောင်ကာလိမ်းဆေးတွေကြောင့် ဖြစ်တတ်တယ်။ အဆီအဆိမ့်များတဲ့အစားအသောက်နဲ့ အပူအစပ်တွေကြောင့် ချွေးထွက်များရာကနေ ဆဲလ်သေပိတ်ဆို့ပြီး ဖြစ်တတ်တယ်။ ဟော်မုန်းကြောင့်ဖြစ်တာ ရှားတယ်။ သို့သော် testosterone များခြင်းက အဆီဂလင်းကို ပိုအလုပ်လုပ်စေတာကြောင့် အဆီဂလင်းပိတ်ဆို့နိုင်တယ်။ အဆီပိတ်ဆို့တဲ့ မွှေးညှင်းပေါက်က ပိုးဝင်ရင် pustule ပြည်ဖုသေးသေးလေးတွေ ဖြစ်လာမယ်။ ဒါက ပြည်ဖုဝက်ခြံဆိုတာ အဆီဖုဝက်ခြံရဲ့ နောက်ဆက်တတွဲ ဆိုးကျိုးတစ်မျိုး ဖြစ်ပါတယ်။ ရလာဒ်ကတော့ ဝက်ခြံအမာရွတ်တွေ ပေါ်ပေါက်လာတာဖြစ်တယ်။ 

လိမ်းဆေးများ

အဆီဖုဝက်ခြံ သက်သာစေဖို့ Salicylic acid လိမ်းဆေးတွေက အကောင်းဆုံးဖြစ်တယ်။ Sebogel လိမ်းဆေးက Salicylic acid 2% ပါလို့ အဆီဖုဝက်ခြံတွေကို သက်သာပျောက်ကင်းစေတယ်။ ဒါ့ပြင် Nicotinamide 6%ပါလို့ ချွေးပေါက်ကျယ်တာတွေကို သက်သာစေတယ်။ Sebogel လိမ်းဆေးကို တစ်ရက် သုံးကြိမ် နေ့စဉ်ပုံမှန်လိမ်းပါ။

မျက်နှာသစ်ဆေးတွေထဲမှာ salicylic acid, glycolic acid, lactic acid, tartaric acid ပါတဲ့ဝက်ခြံပျောက်ဆေးတွေ သုံးစွဲသင့်တယ်။ cutishine wash, salcee wash စတဲ့ မျက်နှာသစ်ဆေးကို တစ်ရက် (၂)ကြိမ် နေ့စဉ်သုံးသင့်တယ်။ 

ဆဲလ်သေတွေဖယ်ရှားဖို့ Benzoyl peroxide, tretinoin, tazarotene လိမ်းဆေးတွေ လိမ်းဖို့ လိုကောင်း လိုနိုင်ပါတယ်။ အရေပြားရဲတာ၊ လောင်တာ၊ ယားယံတာရှိတတ်လို့ ဆရာဝန်ညွှန်ကြားမှသုံးစွဲသင့်တယ်။ 

အဆီဖုဝက်ခြံအတွက် အိမ်သုံးနည်းများ

• Tea tree oil (လက်ဖက်ပင်ဆီလိမ်းခြင်း)

• Aloe vera gel (ရှားစောင်းလက်ပပ် လိမ်းခြင်း)

• witch hazel oil (ဟေဇယ်ဆီလိမ်းခြင်း)

• Apple cidar vinegar (ပန်းသီးရှာလကာရည်တို့ခြင်း)

ကာကွယ်ခြင်း

Whiteheads (အဆီဖုဝက်ခြံ)ကာကွယ်ဖို့ အတွက် အဆီများတဲ့ moisturizerလိမ်းဆေး၊ မိတ်ကပ်နဲ့ နေလောင်ကာခရင်မ် တွေ ရှောင်ကျဉ်သင့်တယ်။ 

ဝက်ခြံနဲ့ အစားအစာ

အစာချေခြင်းကို အားပေးတဲ့ သစ်သီးဖျော်ရည်တွေသောက်ပါ။ ဆား၊ အချိုမှုန့်မပါဝင်တဲ့ အစားအသောက်တွေကို စနစ်တကျရွေးချယ်ပါ။ ချွေးပေါက်ပိတ်မှု မဖြစ်ပွားအောင် ပူအိုက်တဲ့အစားအသောက်တွေ ရှောင်ပါ။ အဆီအဆိမ့်များတဲ့အစားအသောက်တွေက အဆီပိုထွက်နိုင်လို့ ရှောင်ကျဉ်ရမယ်။

ဒေါက်တာအေးမင်းထူး

အရေပြားအထူးကုဆရာဝန်