Fordyce angiokeratoma ဆိုတာ အမျိုးသားကပ်ပယ်အိတ်မှာ အဖြစ်များတဲ့ အသားပိုပုံစံ သွေးကြောလုံးလေးတွေ ဖြစ်တယ်။ ဒီ အသားပိုသွေးကြောလုံးလေးတွေကို ကျားမအင်္ဂါစပ်တွေမှာ အဓိကတွေ့ရတယ်။ မိန်းမကိုယ်အပေါက်ဝ (vulva)နေရာတွေမှာလည်း ဖြစ်တတ်တယ်။ အရေပြားအောက်လွှာ (papillary dermis)မှာ ဆံခြည်မျှင် သွေးကြောတွေ ထုံးပြီး အိတ်ပုံစံ အဖုလုံးလေးတွေ ဆက်တိုက် ဖြစ်လာပါတယ်။ အလုံးလေးတွေက ကြွက်နို့နဲ့ ဆင်တူတယ်။

ဘာ့ကြောင့်ဖြစ်မှန်း သေချာမသိရဘူး။ အသက်အရွယ်ကြီးရင့်မှုနဲ့ဆိုင်တယ်။ ဟော်မုန်းအပြောင်းအလဲကြောင့် ဖြစ်နိုင်တယ်။ အသက်(၄၀)ကျော်အရွယ်တွေ အဖြစ်များတယ်။ ကိုယ်ဝန်ဆောင်နဲ့  တားဆေးသုံးသူတွေ ဖြစ်နိုင်ချေရှိတယ်။ အသက်ကြီးလာတာနဲ့ အမျှ fordyce angiokeratoma သွေးကြောလုံးလေးတွေလည်း ပိုများလာတတ်တယ်။ ကူးစက်ရောဂါမဟုတ်လို့ စိုးရိမ်ဖို့ မလိုပါဘူး။

ကုသနည်း

ဆံခြည်မျှင်သွေးကြောလုံးလေးတွေ ဖြစ်လာရင် cryotherapy (အေးခဲစေခြင်း)၊ electrocautery (လျှပ်စစ်တို့ခြင်း)၊ shave excision (ဖြတ်ခြင်း)၊ laser (လေဆာပစ်ခြင်း) စတဲ့နည်းတွေနဲ့ ကုသနိုင်တယ်။ လေဆာပစ်တဲ့အခါ သွေးကြောထုံးတွေရဲ့ အရောင်ပေါ်မူတည်ပြီး wavelength လှိုင်းအလျားကို ပြောင်းလဲအသုံးပြုနိုင်ရင် ရလာဒ်ပိုကောင်းတာ တွေ့ရတယ်။

ဒေါက်တာအေးမင်းထူး

အရေပြားအထူးကုဆရာဝန်